COP steet fir Konferenz vun de Parteien (Conference of Parties). Et handelt sech ëm déi järlech Klimakonferenz vun de Vereenten Natiounen, déi all Joer an enger anerer Stad organiséiert gëtt. Säit der éischter COP zu Berlin am Joer 1995, gëtt op dëse Konferenzen evaluéiert, wat d’Parteien (also déi Länner, déi mat ënnerschriwwen hunn) erreecht hunn a wéi eng Progrèsen et ginn. Hei ginn och d’Negociatioune gefouert fir déi nächst Ronn un CO2-Reduzéierungen. D’Konferenze vun de Parteie sinn immens wichteg fir d’Entwécklungen am Beräich vum Klimaschutz ze iwwerwaachen a fir nei Ziler opzesetzen, déi fir d’Anhale vum Paräisser Ofkommes an Zukunft erreecht musse ginn.
Eng COP besteet aus dräi Haaptvoleten: Negociatiounen, Expoen an Nieweveranstaltungen. D’Gaaschtland wielt e President vun der COP aus, deen d’Negociatioune presidéiert. Dës bilden den Haaptdeel vun der Veranstaltung. An der Reegel fannen déi éischt Woch technesch Negociatiounen tëschent Vertrieder vun der Regierung statt, wärend déi zweet Woch éischter héichrangeg Reunioune vu Ministeren a Staatscheffen am Fokus stinn.
Déi nächst COP (COP29) fënnt vum 11. bis den 22. November 2024 zu Baku am Aserbaidjan statt. D’Lëtzebuerger Klima-Negociateuren huelen och un dëser COP deel a wäerte sech fir ambitiéis Moossname fir d’Andämmung vum Klimawandel an d’Upassung u seng Auswierkungen, souwéi fir eng finanziell Ënnerstëtzung fir déi Länner, déi am stäerksten dovu betraff sinn asetzen.
Liest d'COP28 PressematdeelungClimate Youth Delegates
Jugend-Klimadelegéiert Lëtzebuerg bei der COP29
Dëst Joer ass déi éischt Kéier, dass op der COP29 zu Baku, Aserbaidschan, de Ministère fir Ëmwelt, Klima a Biodiversitéit zwee Climate Youth Delegates an hir Delegatioun ophëlt, wat hinnen erméiglecht un deVerhandlungen Deel ze huelen.
Léiert eis Climate Youth Delegates Lëtzebuerg 2024-2025 kennen
Natasha Lepage
D’Natasha Lepage huet 2022 säi Schoulofschloss am Fieldgen gemaach a studéiert aktuell Politik, International Relatiounen a Geographie um University College Dublin an Irland. Hatt gouf zum Climate Youth Delegate duerch en Opruff vum Jugendrot ausgewielt.
„Ech gleewen un d’Kraaft vun der jugendlecher Interessevertriedung. Mir, als Jonker, hunn esou vill bäizedroen, an eis Ablécker si wichteg wa mir global Erausfuerderungen diskutéieren. Ech gleewen, dass de Wandel elo muss geschéie , an ech sinn engagéiert en Ënnerscheed ze maachen als eng vun deenen éischte Climate Youth Delegates vu Lëtzebuerg.“
Frida Thornsteinsdottir
D’Frida Thornsteinsdottir huet 2024 säi Schoulofschloss an der International School Luxembourg gemaach a studéiert Biologie op der Universitéit Lëtzebuerg. Hatt gouf als Climate Youth Delegate ënnert de Gewënner vun dem Concours “Fondation Jeunes Scientifiques Luxembourg” mat sengem Fuerschungsprojet iwwer den Effekt vum Klimawandel an déi domat verbonnen Ännerung vun der Mierwaassertemperatur op d’Migratiounsverhale vun der wëller Mierforell an Island, ausgewielt.
„Ech fille mech geéiert kennen, un der COP29 Deel ze huelen a mäin Engagement fir d’Interessevertriedung vun der Ëmwelt ënnert Beweis ze stellen an d’Lëtzebuerger Jugend ze vertrieden. Ech gleewen, dass jonk Stëmmen immens wichteg si fir d’Gestaltung vun nohaltege Politicken a Praktiken.“
De Climate Youth Delegate Programm
De Programm vun de Climate Youth Delegates (CYD) zu Lëtzebuerg ass e politesche Bildungsprojet, deen dorop ausgeriicht ass, lëtzebuergesch Jugendambassadeuren ze kreéieren, ze stäerken an z’ënnerstëtzen, fir sécherzestellen, dass der Lëtzebuerger Jugend hir Stëmm iwwer Klimafroen op der internationaler Bün gehéiert gëtt.
Climate Youth Delegates si Leit, déi offiziell d’Interesse vun der Jugend aus hirem Land op der 29. Konferenz vun de Parteien (COP29) am Kader, vun der Konventioun iwwert Klimawandel vun de Vereenten Natioune, vertrieden. Si ginn ausgewielt fir déi national Klimadelegatioun vun hirer Regierung op der COP29 zu Baku, Aserbaidschan, vum 11. bis 22. November, ze begleeden.
D’Roll vun de Climate Youth Delegates ass et, hir Delegatioun bei Theme vun der Jugend- a Klimastrategie z’ënnerstëtzen an un der allgemenger Aarbecht vun hirer Delegatioun matmaachen andeems si un informellen Treffen a Verhandlungen deelhuelen. D'Climate Youth Delegates wäerten d’Méiglechkeet hunn, Jugenddelegéiert aus der ganzer Welt ze treffen. Ee vun den Ziler vun der UNFCCC COP ass et, d’Jugend an der Bekämpfung vum Klimawandel duerch Eventer, Atelieren an Aktivitéiten, déi vu Jonker organiséiert ginn, ze bestäerken. Jugendlecher spillen eng wichteg Roll de Kampf géint de Klimawandel op globalem Niveau ze promovéieren.
Méi Informatiounen iwwer de Programm fannt dir op, jugendrot.lu.
Jugendrot
De Jugendrot ass den Daachverband vun de Lëtzebuerger Jugendorganisatiounen. Seng iwwert 30 Memberorganisatiounen (politesch Parteien, Scouten, Gewerkschaften, Studentevertrieder, Jugendveräiner…) sinn an den ënnerduerchschnëttleche Beräicher vum Jugendsecteur aktiv. De Jugendrot ass e privilegéierten Uspriechpartner vu Ministèren an aneren institutionellen Acteuren iwwert Jugendtheme a setzt sech aktiv fir d’Interesse vun der lëtzebuergescher an europäescher Jugend an.