Wat soen eis nei Gemenge-Responsabel zum Klimaschutz?

Ufank des Joers huet eis de neie Busser Schäfferot verrode, wat si di nächste Joren a punkto Klimaschutz Wëlles hunn.

 

Wat wëll är Gemeng di nächste 6 Joer fir de Klimaschutz maachen? Wat sinn är Ziler am Klimapakt?

Eis läit eng héich Liewensqualitéit am Duerf um Häerz, dofir wäerte mir konsequent op Verkéiersberouegung mat 30er Zonen a Spill-Stroosse setzen.

Mir wëllen, dass een innerhalb vun eisen Dierfer net méi muss den Auto huelen, d’Verbesserung an den Ausbau vun de Fouss- a Vëlosweeër sinn dowéinst eng wichteg Prioritéit fir eis.

Bei neie Lotissementer fuerdere mir vill Gréngflächen mat Hecken a Beem. An iwwer Schoulaktivitéiten, ënner anerem an eisem Chalet pédagogique am Bësch, versiche mir de Kanner d‘Natur méi nozebréngen a si fir d‘Erhale vun eiser Ëmwelt ze sensibiliséieren.

Mir setzen eis och weider a fir eist eege Quellewaasser kënnen ze notzen a wäerten d’Quelleschutzzonen ëmsetzen.

D‘Gemeng wäert och weiderhi vill an d’Infrastrukture vum Ofwaasser (Kanal a Kläranlagen) stiechen, fir optimale Gewässerschutz ze garantéieren.

Eist Sprëtzenhaus gëtt ëmgebaut zum zukünftege Gemengenhaus an hei striewe mir den héchsten Energie-Standard un.

Am Klimapakt wëlle mir eis um aktuellen Niveau vun der Sëlwer-Médaille behalen a schaffen dem Ziel och weider zou.

Wéi versicht Dir är Awunner mat an d’Klima-Boot ze kréien an ze motivéiere matzemaachen?

Mir hunn elo kierzlech eng nei Kommissioun an d’Liewe geruff: d’Bauten-, Infrastruktur- an Ëmweltkommissioun. All Bierger aus der Gemeng ass invitéiert hei matzemaachen an seng Iddien anzebréngen.

Mir halen drop, dass dat lokaalt Holzpotenzial aus eise Gemenge-Bëscher genotzt soll ginn, dowéinst organiséiere mir all Joer eng Holz-Stee fir eis Awunner.

An eisem Gemengebuet kommunizéiere mir vill iwwer Ëmwelt-, Klima- an Energie-Themen. Mir versichen och zënter enger Zäit d’Schoulkanner ze sensibiliséiere  fir ze Fouss an d’Schoul ze kommen.

D’Gemeng gëtt Subside fir Photovoltaik- an thermesch Solar-Anlagen sou wéi fir Reewaassersammelanlagen, nieft de kantonale Primmen fir energieeffizient Haushaltsgeräter. Op der neier Maison Relais hu mir eis zweet  kommunal Photovoltaik-Anlag installéiere gelooss.

All Joer maache mir beim Dag vum Bam mat, zesumme mam Fierschter planzen eis Schoulkanner Hecken un.

Wat sinn di wierkungsvollst Klima-Projeten, déi Dir an der Vergaangenheet ëmgesat hutt?

Den Ubau vun eiser neier Maison Relais ass Passivhaus-Standard. Wéi gesot, läit do och eng Photovoltaik-Anlag um Daach.  Um Atelier läit eng éischt kommunal Photovoltaik-Anlag.

Virun zwee Joer hu mir ee Solar-Kadaster maache gelooss, wou ee ganz genau d’Solar-Potenzial vun ALL Daach an eiser Gemeng gesäit. Mir wënschen eis, dass méi Bierger heirop zréckgräifen. Et brauch een eist just unzeruffen a mir ginn Iech gäeren all d’Info zu ärem Daach (Tel: 838022-30 oder -31).

Zënter ville Jore schaffe mir zesumme mam SICONA fir d’Drëchen- a Fiichtwissen an eiser Gemeng ze ënnerhalen.  

Wat sinn ärer Meenung no méiglech Léisunge fir Lëtzebuerg an der Klima-Politik?

An eisen An si folgend Punkten Usätz fir Lëtzebuerg méi fit a punkto Klimaschutz ze maachen:

  • Aarbechtsplaze méi dezentraliséieren
  • Flexibiliséierung vun de Aarbechtszäiten
  • E-Mobilitéit promovéieren
  • Maut fir an d’Stad oder zu guer an d’Land eran
  • Méi erneierbare Stroum produzéieren an des Anlagen (Biogas, Wandmillen,...) och an der Landschaft akzeptéieren.
  • De lokalen Handel a lokal Produkter stäerken an ënnerstëtzen
  • Opfänk-Parkingen op de Grenzen ariichten
  • Tram ausbauen
  • Bezuelbare Wunnraum no bei den Aarbechtsplaze schafen
  • Verschidde Virschrëften iwwerdenken, wéi zB dass an der Maison Relais aus hygienesche Grënn net dierf d’Geméis aus dem Schoulgaart verschafft ginn a méi maachen fir den Anti-gaspillage alimentaire
  • Bewosstsinn-Bildung, Sensibiliséierung bei all de Bierger fir ee méi nohaltegen, respektvollen Ëmgang mat eise Ressourcen.

Wat bréngt der Groussbusser Gemeng d’Zesummenaarbecht am Kanton um Niveau vum Klimaschutz?

Zesummen si mir méi staark! Méi Käpp, méi Iddien! D’Zesummenaarbecht spornt un a fuerdert den Éiergäiz ;-) Zu 10 Gemengen huet ee sécherlech och méi Gewiicht wéi eng eenzel Gemeng. Gemeinsam Projeten ëmsetzen ass definitiv och méi rentabel! A mir léiere vun en een! Alles an allem, nëmme Virdeeler!

An elo huet jidderee vun Iech nach ee Wonsch...

Paul Engel: “Mäi Wonsch ass, dass mir all méi am Aklang mat der Natur liewen a wirtschaften a sou de kommende Generatiounen eng liewenswäert  Zukunft hannerloosse kënnen. Ech fannen, mir sollten och eng Kéier eng Diskussioun iwwer d‘Zukunft vum ländleche Raum zu Lëtzebuerg féieren: wéi kënnen eis Dierfer attraktiv bleiwen, souwuel um ekonomeschen, soziale wéi och kulturelle Niveau.”

Armand Olinger: “Et steet nach vill Aarbecht un a punkto Energie-Versuergung, Landwirtschaft, Mobilitéit, ... Ech wënsche mir, dass d’Bierger nach méi déi erneierbar Energien ënnerstëtzen. Et ka net sinn, dass ee weder Wandmillen, nach Biogas oder grouss PV-Anlagen an der Landschaft akzeptéiert an awer all Dag Stroum aus der Steckdous wëll hunn. Deemno: Du kanns dech net wäschen, ouni dech naass ze maachen.”

Marc Goelff: “Wa mir wëllen eise Kanner eng liewenswäert Welt hannerloossen, dann ass et un eis dat elo virzebereeden.”